Mediat serbe: Kryeministri i Serbisë pritet të japë dorëheqjen këtë të martë

Mediat serbe shkruajnë se Kryeministri i Serbisë, Millosh Vuçeviç, pritet të japë dorëheqjen si shefi i ekzekutivit këtë të martë.

Sipas burimeve të Tanjug, ai do të mbajë një konferencë të jashtëzakonshme për media në orën 11:00 në Qeverinë e Serbisë, ku pritet të bëjë njoftimin e dorëheqjes së tij.

Dorëheqja e Vuçeviçit pritet të ndodhë si përgjigje ndaj kërkesave të protestuesve që prej muajsh kanë paralizuar Beogradin, pas një aksidenti tragjik në Novi Sad në nëntor, ku shembja e një tende në stacionin e trenit, shkaktoi vdekjen e 15 personave.

Protestuesit, të cilat kanë bllokuar kryqëzimet kyçe në Beograd me pjesëmarrje dhe të fermerëve dhe traktorëve të tyre, kanë kërkuar përgjegjësi për incidentin dhe kanë theksuar shqetësimet për korrupsionin e qeverisë. Tubimet janë rritur masivisht gjatë javëve të fundit, duke ngritur presion mbi autoritetet për të marrë masa ndaj shkaktarëve të tragjedisë dhe për të adresuar kërkesat e tyre për reforma.

Në një deklaratë të përbashkët me kryetaren e parlamentit, Ana Brnabiç, presidenti Vuçiç deklaroi të hënën nevojën për dialog me studentët me qëllim uljen e tensioneve.

Në përpjekje për të qetësuar situatën dhe për të ruajtur stabilitetin politik, Vuçiç njoftoi një “riformatim urgjent dhe të gjerë të qeverisë”.

LEXONI GJITHASHTU:

• Ish-presidentja: Protestat në Serbi e Gjeorgji janë luftë kundër dominimit rus
• Protestat në Serbi, Vuçiç akuza agjentëve të huaj: Duan të më rrëzojnë