Megaoperacioni Tempulli/ Hajdarmataj: Shumë bujë, asnjë bos droge s’është arrestuar

Ish-drejtuesi i policisë Arben Hajdarmataj tha në një intervistë për Euronews Albania se e vlerëson punën e policisë për operacionin “tempulli” por nuk mendon se ajo është një arritje aq e madhe sa po përflitet.

Sipas tij është e vërtetë që ka shumë të arrestuar, por ata të arrestuar sipas ish-drejtuesit të policisë janë hallka e fundit e zinxhirit dhe nuk ndikojnë në prishjen e strukturës së grupeve kriminale.

“Në qoftë se do marrim zinxhirin e aktivitetit kriminal, ne kemi kapur për mendimin tim hallkën e fundit. Hallka e fundit, ka vlerë por nuk ka vlerë reale, pasi nuk e prish zinxhirin e aktivitetit kriminal. Ne kemi kapur shpërndarësit që shesin pranë shkollave e pranë lokaleve por nuk kemi kapur as atë që bën ndërmjetësin dhe nuk kemi kapur as atë që organizon shpërndarjen dhe as prodhuesin.

Kemi një hetim të tillë që në fund të fundit kemi diçka por jo aq shumë sa komentohet dhe bëhet publike. Unë personalisht nuk jam me konceptin që të ushqejmë qytetarët me kaq pompozitet dhe me kaq bujë”,-tha Arben Hajdarmataj.

LEXONI GJITHASHTU:

• Lihet në burg Klered Bozhanaj, avokati i tij kërkon ekspertim të gjendjes mendore
• Rishi Sunak diskuton të ndërmarrë masa më të rrepta kundër duhanit