Ministria e Arsimit: Matura Shtetërore 2026 vijon normalisht, përjashtohet një maturant në Kukës pas publikimit të tezës

Ministria e Arsimit dhe Sportit e Shqipërisë ka garantuar se provimi i Gjuhës Shqipe dhe Letërsisë i Maturës Shtetërore 2026 po zhvillohet në kushte të plota sigurie, transparence dhe në zbatim strikt të rregullores përkatëse, duke përfshirë mbi 26,600 maturantë në të gjithë vendin.

Sipas njoftimit zyrtar, provimi i dytë i Maturës Shtetërore po zhvillohet normalisht në 144 qendra provimi, në ambiente të monitoruara dhe me masa të shtuara sigurie, për të garantuar barazi dhe integritet të procesit.

Ministria sqaron se publikimi në rrjetet sociale i fotografive të tezës së provimit ka ndodhur pasi testi kishte nisur dhe nuk ka ndikuar në ecurinë apo vlefshmërinë e provimit.

Megjithatë, autoritetet konfirmojnë se rasti është identifikuar në një qendër provimi në Qarkun e Kukësit, ku një maturant që ka publikuar tezën është përjashtuar menjëherë nga provimi.

Ministria e Arsimit dhe Sportit e Shqipërisë thekson se ndaj çdo shkeljeje do të merren masa disiplinore jo vetëm për nxënësit, por edhe për të gjithë zinxhirin administrues në qendrat e provimit, në përputhje me rregulloren në fuqi.

Institucioni nënvizon gjithashtu se procesi i Maturës Shtetërore është parapërgatitur në mënyrë të plotë, përmes hartimit të testeve me standarde të larta, certifikimit të administruesve, zhvillimit të konsultimeve në shkolla, shpërndarjes së testeve model nga Qendra e Shërbimeve Arsimore, si dhe organizimit të testimeve provë dhe mbështetjes psikologjike për maturantët.

Ministria apelon për respektim të rregullave dhe thekson se garantimi i një Mature Shtetërore të drejtë, të barabartë dhe meritokratike mbetet prioritet deri në përfundimin e të gjitha provimeve.