Mirëmbajtja e sinjalistikës turistike në Gjirokastër, domosdoshmëri për vizitorët

Rritja e fluksit të turistëve në Gjirokastër ka nxjerrë si domosdoshmëri mirëmbajtjen e sinjalistikës turistike dhe tabelave informuese në shërbim të vizitorëve.

Turistët në disa raste ndeshin me dëmtimin e sinjalistikës duke e bërë shqetësim mirorientimin e tyre në vlerat historike dhe ndërtimore të qytetit të gurtë dhe rrethinave. Banorët apelojnë për mirëmbajtjen e sinjalistikës informuese në shërbim të vizitorëve dhe veçanërisht turistëve të huaj.

“Patjetër duhet të mirëmbahen dhe shumë turistë që vijnë pyesin dhe ne sa kemi mundësi këtu në zonën muzeale i sqarojmë për vendndodhjen e kodrës turistike të Këcullës, shtëpisë Kadare”, thotë një banor.

Strukturat e trashëgimisë kulturore kanë kryer ripërtëritjen e sinjalistikës turistike si dhe zëvendësimin e tabelave të dëmtuara por domosdoshmëri ngelet mirëmbajtja dhe mosdëmtimi i tyre.

Tashmë Gjirokastra është kthyer në qendër tërheqëse për turistët vendas dhe të huaj ndërsa përgjatë këtij viti qyteti i gurtë ka mirëpritur rreth 250 mijë turistë.

LEXONI GJITHASHTU:

• Gjirokastër, përfshihet nga zjarri toka bujqësore në Lazarat
• Trafik i rënduar automjetesh në hyrje të Gjirokastrës