Mirgit Vataj: 59% e fëmijëve në Shqipëri kanë të paktën një rast kur janë dhunuar

Në një intervistë të dhënë sot në Euronews Albania, Mirgit Vataj, kryetar i Urdhrit të Punonjësve Social, ka reaguar për rastin e dhunimit të 6-vjeçarit në qendrën Gledis në Astir.

Ai theksoi se, sipas një studimi, 59% e fëmijëve në vend kanë deklaruar se janë dhunuar të paktën një herë gjatë jetës së tyre.

“Profilet e dhunuesve janë shpesh herë ato persona që kanë detyrë të kujdesen për fëmijët, siç janë prindërit, të afërmit, dhe madje edhe institucionet edukative ku ata zhvillohen,” tha Vataj, duke shtuar se dhuna ndaj fëmijëve shpesh ndodh në mjedise ku ata duhet të jenë më të sigurt.

Ai gjithashtu vuri në dukje nevojën për një qasje më të mirë në parandalimin e dhunës, duke u fokusuar tek edukimi i mësuesve dhe edukatorëve për të identifikuar shenjat e dhunës që mund të ndodhin në shtëpi, por gjithashtu duke u kujdesur që të ketë një filtrimi më të mirë të personelit që punon me fëmijët.

“Ka një problematikë të madhe për parandalimin e dhunës, ku shpesh harrohet që duhet të edukojmë profesionistët e fushës për të identifikuar dhe reaguar ndaj këtyre rasteve,” theksoi Vataj.

Kryetari i Urdhrit të Punonjësve Social shprehu gjithashtu shqetësimin se mungesa e një filtrimi të duhur të stafit akademik dhe të punonjësve social është një problem serioz.

“Në momentin e rekrutimit, nuk ka një procedurë të vlerësimit të aspekteve psikologjike dhe emocionale të personelit që merret me shërbimin ndaj fëmijëve. Kjo ka sjellë pasojë të rrezikshme, pasi fëmijët mund të ekspozohen ndaj individëve me profile të dhunshme,” përfundoi Vataj.

LEXONI GJITHASHTU:

• Dhuna nga edukatorja, flet babai i të miturit: Po kërkoj psikolog për djalin
• Proçedohet bashkëshorti i edukatores që dyshohet se keqtrajtoi të miturin