Proçedohet bashkëshorti i edukatores që dyshohet se keqtrajtoi të miturin

Të enjten në emisionin “People’, në Euronews Albania një prind denoncoi se bashkëshorti i edukatores që dyshohet se i keqtrajtoi djalin e mitur në kopësht e ka kanosur.

Pas këtyre deklaratave dhe denoncimit në Komisariatin Nr.6 policia e Tiranës ka proceduar në gjendje të lirë shtetasin I. G., 63 vjeç.

“63-vjecari I.G është bashkëshorti i shtetases Rudina Gërdani e shpallur në kërkim pasi dyshohet se ka keqtrajtuar një të mitur, në kopshtin ku punonte si edukatore ndërsa procedimi ndaj tij nisi pasi dyshohet se nëpërmjet telefonit ka kanosur shtetasin Lorenc Rrapa (babain e të miturit)”, thuhet në njoftimin e policisë.

Kujtojmë që Lorenc Rrapa babai i Priamit 3-vjeçar i cili u dhunua në ambientet e kopshtit “Gledis” nga edukatorja Rudina Gërdani, tashmë e shpallur në kërkim, ishte të enjten i ftuar në emisionin “People” në Euronews Albania ku tregoi për kërcënimet që po merrte pasi denoncoi se djali i tij ishte dhunuar.

“Do shihemi ndryshe bashkë”, këto janë fjalët me të cilat sipas Lorencit bashkëshorti i edukatores e ka kërcënuar.  Megjithatë Lorenci shprehet se nuk mund ta falë gjakun e djalit të tij, ndaj është i vendosur që çështjen e Priamit 3-vjeçar ta çoj deri në fund.

LEXONI GJITHASHTU:

• Edukatorja i dhunoi djalin 3-vjeç, babai: Burri i saj më kërcënoi në telefon…
• “Djali 3-vjeç më tha se e dhunoi edukatorja”, babai: Kërkova pamjet e kamerave…