Elon Musk thotë se do riaktivizojë profilin e Trump në Twitter

Pronari i kompanive “Tesla” dhe “SpaceX”, Elon Musk ka deklaruar se do të lejojë sërish profilin e presidentit Donald Trump në rrjetin social Twitter.

Duke folur në konferencën “E ardhmja e makinës”, e organizuar nga gazeta “Financial Times”, Musk tha se vendimi për të dëbuar ish-presidentin republikan kishte qenë “imoral dhe ekstrem”.

Musk, i vetëquajtur një mbështetës i lirisë së shprehjes, së fundmi nënshkroi një marrëveshje prej 44 miliardë dollarësh për të blerë platformën e medias sociale.

Pezullimi i profilit të Trump, i cili kishte mbi 88 milionë ndjekës, i dha fund megafonit kryesor të ish-presidentit vetëm disa ditë përpara përfundimit të mandatit.

Gjithashtu, ai erdhi pas debateve disavjeçare mbi mënyrën se si kompanitë që menaxhojnë rrjetet sociale duhet të mbikëqyrin llogaritë e liderëve të fuqishëm globalë.

Trump u pezullua në mënyrë të përhershme nga Twitter pak pas sulmeve të 6 janarit në Capitol Hill. Asokohe, kompania citoi si motiv të vendimit të saj “rrezikun për thirrje të mëtejshme për dhunë”.

Vetë Trump deklaroi së fundmi për “Fox News” se nuk do të kthehej në Tëitter edhe nëse Musk do ta blinte platofrmën dhe do të riaktivizonte profilin e tij.

Ai theksoi se do të përdorte rrjetin e tij të quajtur “Truth Social”, aplikacioni i të cilit doli në dyqanin e “Apple” në fund të shkurtit, por që eci me ngadalë derisa numri i përdoruesve u rrit së fundmi.

LEXONI GJITHASHTU:

• ‘Nëse vdes…’, Elon Musk bën disa postime shqetësuese në Twitter
• Miqtë e Elon Musk do të kontribuojnë me mbi 7 mld dollarë për blerjen e Twitter