NATO refuzon Ukrainën: Një zonë ndalim-fluturimi zgjeron luftën në Europë

Vendet anëtare të NATO-s refuzuan të premten kërkesën e Ukrainës për një zonë “ndalim fluturimi”, me argumentin se krijimi i saj për t’i bërë kontrast Rusisë do të bënte që lufta në Ukrainë të përhapej në të gjithë Evropën.

“NATO është një aleancë mbrojtëse. Detyra jonë është të ruajmë sigurinë e 30 vendeve. Ne nuk jemi pjesë e këtij konflikti dhe kemi përgjegjësi të garantojmë që ai të mos përshkallëzohet dhe të përhapet përtej Ukrainës, pasi kjo do të ishte shkatërruese dhe e rrezikshme”, tha Jens Stoltenberg, sekretar i përgjithshëm i NATO-s.

Presidenti ukrainas Volodymyr Zelensky u kishte kërkuar fuqive perëndimore të ashpërsonin masat kundër lëvizjeve ajrore të Rusisë, që kur ajo nisi pushtimin 9 ditë më parë.

“Ne e kuptojmë dëshpërimin, por edhe besojmë se nëse e krijojmë këtë zonë, do të përfundonim në një luftë në shkallë Evropiane, që do të përfshinte më shumë vende dhe do të shkaktonte shumë më tepër vuajtje”, u shpreh kreu i NATO-s.

Vendet e NATO-s kanë dërguar armatime në Ukrainë, por nuk kanë ndërmarrë aksione ushtarake që do t’i vendoste ato në përplasje direkte me Rusinë.

Në fjalën e tij, Stoltenberg paralajmëroi se ditët në vijim me gjasa do të jenë më të vështira për ukrainasit, pasi do të ketë më shumë vdekje, vuajtje dhe shkatërrim nga agresioni rus.

LEXONI GJITHASHTU:

• Zyrtari britanik: Ndalim-fluturimi për Rusinë mund të çojë në luftë Europën
• Biden: Sot mbyllim hapësirën ajrore për avionët rusë