Ndahet nga jeta Fatos Nano

Ish-kryeministri Fatos Nano është ndarë nga jeta në moshën 73-vjeçare. Prej më shumë se 3 javësh Nano gjendej i shtruar në një spital privat në kryeqytet në gjendje të rëndë.

Nano ndodhej në spital prej datës 8 tetor pas problemeve kronike respiratore. Ish-kryeministri, Nano pësoi arrest kardiak dhe më pas vdekje klinike të trurit. Prej ditësh gjendja e tij shëndetësore ishte e rënduar dhe pa përmirësim. Në 16 shtator të këtij viti, ish-lideri histrorik i PS, Nano festoi ditëlindjen e 73-të.

Të dielën do të zhvillohen homazhet në Pallatin e Kongreseve ndërsa pritet të dalë Vendimi i Këshillit të Ministrave, i cili do të përcaktojë detajet e tjera rreth organizimit të ceremonive dhe nderimeve shtetërore për ish-kryeministrin.

Pas ndarjes nga jeta të ish-kryeministrit shumë figura të rëndësishme të politikës kanë reaguar. Kryeministri Edi Rama ka publikuar në “Facebook” një foto të Nanos ndërsa shkruan “Lamtumirë kryetar”.

Presidenti Bajram Begaj në reagimin e tij u shpreh se Fatos Nano do të mbahet mend si lideri liberal dhe reformator. Politikanë nga opozita dhe Partia Socialiste kanë vlerësuar kontributin e ish-kryeministrit duke e cilësuar si person me vizion.

Fatos Nano ka qenë një ndër figurat më të spikatura të tranzicionit demokratik pas viteve ’90. Ai udhëhoqi Partinë Socialiste që nga themelimi i saj, duke e kthyer në një forcë të rëndësishme politike dhe më pas në parti qeverisëse. Në vitet kur Shqipëria përballej me sfida të mëdha ekonomike e shoqërore, Nano mbajti disa herë postin e kryeministrit, duke lënë gjurmë në proceset e reformave dhe në përpjekjet për stabilizimin e vendit.

Gjatë karrierës së tij, Nano është vlerësuar për rolin e tij në modernizimin e së majtës shqiptare dhe afrimin e politikës shqiptare me standardet europiane. Ai do të kujtohet si një figurë që la ndikim të fortë në jetën publike dhe në kulturën politike të vendit.

Profili i Fatos Nanos

Fatos Nano lindi më 16 shtator 1952 në Tiranë. Ai u diplomua në Fakultetin e Ekonomisë në Universitetin e Tiranës dhe më pas u përfshi në jetën publike pas rënies së regjimit komunist. Në vitin 1991 themeloi Partinë Socialiste të Shqipërisë, duke qenë kryetar i saj deri në vitin 2005. Nano shërbeu si kryeministër i vendit në vitet 1991, 1997–1998 dhe 2002–2005.

Gjatë drejtimit të tij, ai u përpoq të forconte institucionet demokratike, të nxiste hapjen e Shqipërisë ndaj Evropës dhe të stabilizonte vendin pas krizave të rënda politike dhe ekonomike. Pas largimit nga jeta politike aktive, Nano qëndroi në prapaskenë, duke dhënë herë pas here qëndrime për zhvillimet politike në vend.

LEXONI GJITHASHTU:

• “Lamtumirë kryetar”, Rama reagon pas ndarjes nga jeta të ish-kryeministrit Nano
• PROFIL| 3 herë kryeministër i Shqipërisë, kush ishte lideri historik i PS Fatos Nano