Ndahet nga jeta shkrimtari Faslli Haliti, autor i mbi 20 veprave dekoruar me Urdhrin Naim Frashëri

U shua sot në moshën 85-vjeçare shkrimtari Faslli Haliti, i njohur gjithashtu për pikturat, historiografinë dhe kontributin e tij si deputet i Partisë Socialiste gjatë periudhës 1998-2001.

Lajmi u konfirmua nga Qendra Kombëtare e Librit dhe Leximit, e cila u shprehu ngushëllime familjarëve dhe të njohurve të tij.

Haliti u lind më 5 dhjetor 1935 në Lushnjë. Pasi kreu Liceun Artistik për pikturë, u diplomua për gjuhë-letërsi dhe nisi fillimisht punën si mësues vzitatimi në vendlindje.

Për shkak të qëndrimeve dhe pikëpamjeve të tija të shprehura në veprimtarinë artistike, u përndoq nga sistemi komunist dhe u detyrua të punonte si kooperativist i thjeshtë dhe iu mohua e drejta e botimeve.

Pas rrëzimit të komunizmit qe aktiv në disa botime antologjie në disa gjuhë si italisht, anglisht, gjermanisht e greqisht, ndërsa publikoi dhjetëra libra, kryesisht poezi.

Kontributi i tij u nderua me dekoratën e Urdhrit Naim Frashëri i Artë pas dy dekoratash të mëparshme të klasit të III dhe klasit të I-rë, ndërsa qyteti i Lushnjës e pati shpallur qytetar nderi.