Ndërtohet tuneli i Murrizit, Balluku: Kur pritet të hapet për qarkullimin e mjeteve

Në rrugën e Arbrit që lidh Tiranën me Dibrën, punimet në tunelin e Murrizit, me gjatësi 3,7 km, kanë përfunduar. Gjatë inspektimit të kësaj vepre, Ministrja e Infrastrukturës dhe Energjisë, Belinda Balluku, deklaroi se makinat do të nisin të kalojnë në muajin mars.

“Puna në tunelin e Murrizit, një ndër veprat më të rëndësishme të rrugës së Arbrit, është përmbyllur. Ai do të hapet në marsin e vitit 2025, kur edhe tuneli i emergjencës të ketë përfunduar. Tuneli i Murrizit është një tub i hekurt, i armatuar në 360 gradë, jo vetëm në kupolë, por edhe në dysheme, për të krijuar qëndrueshmëri,” deklaroi Balluku.

Ajo theksoi se ndërtimi i kësaj vepre ishte i vështirë për shkak të gjeologjisë së tokës dhe hodhi poshtë zërat se qeveria ka rritur financimet për ndërtimin e saj.

“Kontrata e rrugës së Arbrit është e lidhur me çelësa në dorë dhe shteti shqiptar nuk ka shtuar asnjë qindarkë. Është e njëjta paketë financiare siç është parashikuar në nisje të punimeve,” tha Balluku.

Me një gjatësi rreth 74 km, rruga e Arbrit i ka kushtuar buxhetit të shtetit 33.6 miliardë lekë. Ajo pritet të bëhet një korridor lidhës i rëndësishëm Lindje-Perëndim.

LEXONI GJITHASHTU:

• Balluku: Program për ndryshimet e klimës, sinjalizohen rreziqet nga katastrofat
• Balluku inspekton punimet për ujësjellësin e Patosit: Reforma në UK po jep rezultate