Ndryshim në listën e Kombëtares, Silvinho grumbullon Nazmi Gripshin

Trajneri Silvinho ka bërë një ndryshim në listën e Kombëtares pas dëmtimit të dyshes Ismajli-Pajaziti, duke thirrur mesfushorin e Astanës, Nazmi Gripshi.

Më parë, Sylvinho ishte kritikuar për mos thirrjen e tij, por tani është radha e Gripshit për të treguar veten me fanellën e ekipit kombëtar.

Mesfushori që aktivizohet në Kazakistan do të jetë nën urdhrat e teknikut brazilian për dy duelet e kualifikuesve ndaj Serbisë dhe më pas në miqësoren me Jordaninë në Tiranë.

Pas dëmtimit të Ardian Ismajlit dhe Adrion Pajazitit, u vendos që të zëvendësohej njëri prej tyre, dhe u thirr mesfushori 28-vjeçar.

Gripshi ka luajtur më parë në kampionatin shqiptar, ku nisi karrierën te Teuta. Në vitin 2017 iu bashkua Skënderbeut për tre sezone, më pas luajti te Ballkani në Kosovë, dhe që nga 2024 është një nga lojtarët kyç të Astanës në Kazakistan.

Kombëtarja shqiptare vijon përgatitjet në Tiranë, ku gjithçka ka shkuar mirë dhe atmosfera është pozitive.

Grupi stërvitet i plotë, ndërsa në seancat stërvitore është bashkuar edhe mbrojtësi Enea Mihaj.