“Në ç’fazë janë hetimet ndaj gjyqtarëve e prokurorëve?”-Si i përgjigjet Dumani-Çuçit

Në mbledhjen e Këshillit Kombëtar të Integrimit, kryetari i Grupit Parlamentar të Partisë Socialiste, Bledi Çuçi, pyeti kreun e SPAK, Altin Dumanin, për një çështje të evidentuar dhe në Raportin e Progresit.

Fjala është për referimet dhe hetimet proaktive ndaj gjyqtarëve dhe prokurorëve të akuzuar për sjellje kriminale gjatë procesit të vettingut.

“Unë dua t’i qëndroj besnik raportit që ne kemi. Dëgjova zotin Dumani disa ditë më parë të fliste për shqetësimin e mungesës së referimeve nga institucionet publike. Ky nuk ka qenë një shqetësim në Rpaortin e Progresit. Përkundrazi ka pasur një shqetësim lidhur me garantimin e një historiku solid për hetimet proaktive ndaj gjyqtarëve dhe prokurorëve të akuzuar për sjellje kriminale gjatë procesit të vetingut. Cila është gjendja e referimeve proaktive, hetimeve dhe vendimeve përfundimtare në çështjet ndaj gjyqtarëve dhe prokurorëve të akuzuar për sjellje kriminale gjatë procesit të vetingut?”, deklaroi Çuçi.

Nga ana tjetër Dumani iu përgjigj se përsa i përket pjesës së gjyqtarëve dhe prokurorëve që ata kanë nën kompetencë, ka pasur procedime penale, por edhe konfiskime të pasurive.

Sipas Dumanit, nën kompetencën e SPAK janë vetëm gjytarët e Gjykatës Kushtetuese, atë të Gjykatës së Lartë dhe Prokurori i Përgjithshëm.

Ai shtoi se edhe ndaj rasteve që nuk i kanë nën komptencë SPAK nuk ka qënduar indiferent, pasi sipas tij, ka pasur disa procedime edhe ndaj gjyqtarëve e prokurorëve të Gjykatave të Shkallës së Parë dhe Apelit.

“Unë e kam sqaruar se duhet të merret në konsideratë kompetenca e SPAK. Ne kemi kompetencë vetëm gjyqtarët e Gjykatës Kushtetuese, Gjyqtarët e Gjykatës së Lartë, prokurorin e Përgjithshë. Në raport me këto subjekte të posaçme ne kemi proceduar penalisht, kemi dërguar edhe për gjykim, disa anëtarë të Gjykatës së Lartë dhe Kushtetueses, të cilët janë larguar nga vettingu.

Madje ka edhe vendime fajësie të formës së prerë për këtë kategori subjektesh që janë në kompetencën tonë. Madje kemi edhe hetime pasurore në raport me këto subjekte, ku kemi arritur edhe konfiskimin e pasurisë. Por numri më i madh i gjyqtarëve e prokurorëve të shkarkuar nga vettingu i përket gjykatave të shkallës së parë dhe Apelit. Këta nuk janë në kompetencën tonë, vetëm në rast se kryejnë ndonjë vepër penale.

Por ne nuk kemi qenë indiferentë edhe ndaj këtyre rasteve, kemi patur raste që me iniciativën tonë, vetëm nga vendimmarrja e KPK-së, ne kemi regjistruar procedim penal ndaj këtyre gjyqtarëve e prokurorëve të Shkallës së Parë dhe Apelit. Sa i takon subjekteve në kompetencën tonë, ne kemi disa gjyqtarë e prokurorë në ndjekje penale dhe konfiskime të pasurisë”, tha Dumani.

LEXONI GJITHASHTU:

• Arian Çani: Altin Dumani ka dosje të tmerrshme, ja çfarë pritet të ndodhë
• Dumani: Duhet riparë kufiri monetar i korrupsionit që heton SPAK