Nis me përplasje sesioni parlamentar, opozita bllokon foltoren e parlamentit

Këtë të hënë ka nisur sesioni i ri parlamentar. I cili duket se po nis njësoj si u mbyll në vitin 2023, me përplasje mes opozitës dhe mazhorancës.

Deputetët e opozitës kanë bllokuar foltoren duke mbajtur në duar pankartat me mbishkrimin ”Kuvend burrash, jo horrash”, që në nisje të seancës deputetët e opozitës kanë filluar të mos lejojnë zhvillimin normal të saj, duke u rënë bilbilave, ndërsa janë rreshtuar në foltore.

Gazment Bardhi ka kërkuar heqjen e gardës, ndërsa ka debatuar me kryeparlamentaren Lindita Nikolla.

Votimi i ndryshimeve në qeveri

Me gjithë tensionet, Kuvendi votoi për t’i miratuar ndryshimet në Qeverinë e kryeministrit Edi Rama.

Me shumicë votash Blendi Gonxhe u konfirmuar në postin e ministrit të Ekonomisë, Kulturës dhe Inovacionit të Shqipërisë.

Ky ndryshim në qeveri solli edhe shkarkimin e Elva Margaritit si ministre e Kulturës, ndërsa Ervin Mete do të jetë vetëm ministër i Financave, pasi Ekonomia bashkohet me Kulturën dhe Inovacionin.

Qeverisë i shtohet edhe një ministri e re, ajo për Administratën dhe Anti-Korrupsionin që do të drejtohet nga Adea Pirdeni, e cila deri tani ka qenë zëvendësministre e Drejtësisë.

Në Kuvend u betua edhe deputeti më i ri i Partisë Socialiste, Plarent Ndreca. Ai merr mandatin e Arben Ahmetajt, i cili e humbi atë pas mungesës prej gjashtë muajsh në Kuvend.

Ish-zëvendëskryeministri i Shqipërisë Ahmetaj akuzohet për korrupsion, pastrim parash dhe mosdeklarim e fshehje të pasurisë.

LEXONI GJITHASHTU:

• S’u lejua të flasë në Kuvend, Bajram Begaj do mbajë fjalën e tij në Presidencë
• Begaj në Kuvend, Bardhi: U soll si i verbër, u keqpërdor nga Rama, provokoi opozitën