Vlorë, nis prishja e banesave të ndërtuara mbi kanalin e ujërave të shirave

Ka vijuar këtë të martë prishja e banesave që janë ndërtuar mbi kanalet e ujërave të shirave.

Sipas raportimeve, aksioni për pastrimin e plotë të kanalit të ujërave të shirave ka mbërritur në një fazë të rëndësishme, një ndërhyrje e domosdoshme për rikthimin e funksionit të tij dhe parandalimin e përmbytjeve në qytet.

Autoritetet kanë nisur prishjen e ndërtimeve që prej vitesh kanë krijuar pengesa në rrjedhën e kanalit, duke sjellë pasoja të rënda gjatë reshjeve intensive.

Sipas burimeve zyrtare, ky aksion synon zgjidhjen përfundimtare të një problemi të kahershëm, që ka prekur shumë zona të qytetit sa herë ka pasur reshje të dendura shiu.

Banorët e prekur nga ky proces janë njoftuar prej kohësh dhe në vijim do të jenë në fokus të institucioneve, duke u mbështetur përmes programeve të strehimit social.