Nisin hetimet për tragjedinë në Serbi, përfundon operacioni i kërkimit, 14 të vdekur

Serbia ka nisur të shtunën hetimet për shembjen e strehës së betonit mbi hyrjen e një stacioni hekurudhor në Novi Sad të Serbisë, ku humbën jetën 14 persona.

Mediat serbe kanë raportuar se kërkimi ka përfunduar ndërsa Serbia ka shpallur 2 ditë zie pas tragjedisë.

Në mesin e viktimave që ende nuk janë identifikuar ishte edhe një vajzë shtatë vjeç. Ndërkohë të plagosurit kanë marrë lëndime shumë të rënda për jetën.

“Hetimet do të vërtetojnë kush i ka marrë vendimet dhe kush ka vënë nënshkrimet, kush ka qenë i angazhuar për të kontrolluar cilësinë e punimeve”, ka thënë Ministri i Transportit, Goran Vesiq , për mediat serbe.

Konstruksioni prej betoni dhe çeliku u shemb në një moment kur njerëzit kanë qenë poshtë, disa në stola, disa pranë, pasi aty ka edhe një stacion autobusi. Sipas dëshmitarëve okularë, struktura u shemb për pak sekonda dhe nuk kishte mundësi që njerëzit të shpëtoheshin.

Raportohet se ndërtesa e Stacionit Hekurudhor është rikonstruktuar dy herë në dy vitet e fundit.

Presidenti i Serbisë, Aleksandër Vuçiç, në fjalimin e tij para qytetarëve tha se kërkon nga autoritetet hetuese që personat përgjegjës për atë që ndodhi të ndiqen penalisht dhe të dënohen rëndë.

LEXONI GJITHASHTU:

• Shembet çatia e stacionit hekurudhor në Serbi, humbin jetën 20 persona
• Gjermania i bën thirrje Serbisë t’i rishqyrtojë projektligjet për Kosovën