Nisja e vitit të ri shkollor, Presidenti Begaj dhe Kryeministri Rama urojnë nxënësit

Rreth 450 mijë nxënës të arsimit para universitar në vend do të nisin këtë të hënë vitin e ri shkollor.

70 mijë i përkasin kopshteve, rreth 100 mijë janë gjimnazistë dhe 280 mijë në arsimin 9-vjecar. Për herë të parë do të ulen në bankat e shkollës rreth 29 mijë fëmijë që nisin klasën e parë.

Për herë të parë në këtë vit shkollorë, në klasë të parë janë pranuar edhe fëmijët që janë 5 vjeç por që brenda vitit do të mbushin 6. Krahas fëmijëve në sistemin arsimor janë edhe 31 mijë mësues, ndërsa procesi mësimor do të zhvillohet në 1700 shkolla të shpërndara në të gjithë vendin.

Ndërkohë nxënësit i ka uruar dhe presidenti Bajram Begaj dhe kreu i qeverisë Edi Rama, për fillimin e vitit të ri shkollor.

“Suksese në vitin e ri shkollor për çdo nxënës, mësues dhe prind në Shqipëri, e në veçanti për të gjithë ata nxënës që hyjnë në klasë të parë!

Puna dhe përkushtimi juaj i sotëm, ndërtojnë Shqipërinë e së nesërmes”- shkruan Begaj në një postim në rrjetet sociale.

Ndërkohë Rama, ka shkruar se sot ka nisur një rrugëtim i ri i djies.

“Sot, kur dyert e shkollës janë çelur dhe një rrugëtim i ri i dijes sapo ka nisur me himnin kombëtar, u dërgoj një urim të përzemërt për sa më shumë sukses e mbarësi të gjithë fëmijëve, nxënësve, mësuesve e prindërve të gjithë Shqipërisë”- shkruan Rama.

LEXONI GJITHASHTU: 

• Maturanti nga “Petro Nini Luarasi”: Status të mësosh këtu, shkolla e duhur
• “500 € qiraja në Stamboll, nuk jetohet dot”-shqiptarja nga Turqia