Një shqiptar zgjidhet në krye të ‘SPAK-ut’ maqedonas

Islam Abazi është drejtuesi i ri i Prokurorisë për Luftimin e Krimit të Organizuar dhe Korrupsionit.

Abazi është shqiptari i parë që merr këtë post, i cili gjatë historisë së Maqedonisë së Veriut është drejtuar ekskluzivisht nga maqedonas.

Ndryshimi erdhi pas shkarkimit të ish shefes Vilma Ruskovska dhe votimit nga gjithë prokurorët e Maqedonisë së Veriut, të cilët i dhanë besimin prokurorit shqiptar nga Gostivari.

“Duke u bazuar në punën dhe përvojën time të deritanishme, ju them se do e ushtroj këtë detyrë me profesionalitet dhe konform ligjit, dhe do e përfaqësoj denjësisht këtë institucion. Do jemi transparent deri në atë pikë kur nuk cenohet imazhi, identiteti apo fshehtësia e procedurës hetimore”, tha Islam Abazi.

Abazi mohoi zërat se është i lidhur me politikën dhe premtoi luftë të pa kompromis kundër krimit dhe korrupsionit, pa dallime.

“Funksioni i prokurorit publik nuk korrespondon me kryerjen e ndonjë funksioni tjetër publik ose anëtarësi në parti politike, sipas kësaj, asnjëherë nuk kam qenë as nuk jam anëtar i ndonjë partie politike, as në punën time të deritanishme nuk kam lënë përshtypje se unë kam…të themi relacione ose pozicione me parti konkrete politike”, theksoi ai.

Në Prokuroritë e qyteteve në Maqedoninë e Veriut ku jetojnë shqiptarë, përfaqësimi është shumë i dobët.

Në prokurorinë e Islam Abazit për luftimin e krimit të organizuar dhe korrupsionit, ka vetëm dy shqiptarë, prej 12 anëtarëve. Ndërsa situata më e keqe është në Prokurorinë Themelore të Shkupit ku nga 46 prokurorë, vetëm tre janë shqiptarë.

LEXONI GJITHASHTU

• Prodhuesit e ushqimeve në RMV do të paguajnë më pak për energjinë elektrike
• Gazetarë në RMV kërcënojnë me bojkot, duan ndryshime ligjore për mbrojtje nga sulmet
• Partitë shqiptare në RMV të unifikuara: Shqipja të bëhet gjuhë zyrtare e barabartë