Noka: Laer Kurti u vra nga shteti, nuk kishte probleme me ligjin

Deputeti i PD-së, Flamur Noka u shpreh në një intervistë për Euronews Albania se 32-vjeçari Laer Kurti humbi jetën pasi u dhunua nga efektivët e policisë.

Noka tha se Kurti ka mbërritur i pajetë në spital dhe në trupin e tij ka pasur shenja dhune.

“Kemi kërkuar fjalën në Kuvend dhe nuk na është dhënë. Ngjarja është kriminale. I ndjeri Laer Kurti është vrarë nga shteti. Është ngjarje si ajo e Klodian Rashës. Mbrëmë i ndjeri Kurti ka shkuar i vdekur në spital. Në trupin e tij ka pasur shenja dhune. E kanë dhunuar në qeli. Po mundohen ta manipulojnë ngjarjen. Ai nuk ishte kontingjent, as probleme me ligjin. E vrau shtetit”, u shpreh Noka.

Ai shtoi më tej se opozita do të shkojë pranë familjes së të ndjerit për të  shprehur ngushëllimet.

Detaje për ngjarjen:

Laer Kurti humbi jetën pasi u shoqërua nga efektivët në komisariatin nr.3. Policia tha se 32-vjeçari u ndje keq dhe u dërgua në spital ku humbi jetën, ndërsa në deklaratën e Traumës thuhet se Kurti ka shkuar në spital i vdekur.

Në rrugë jo zyrtare është konfirmuar se ka dyshime që në momentin e ndalimit, 32-vjeçari mbante me vete një sasi lëndësh narkotike që e ka gëlltitur.

Viktima ka qenë nën hetim më herët edhe për falsifikim monedhash, por në Gjykatën e Shkallës së Parë mori pafajësi dhe më pas çështja kaloi në Apel.

Dyshohet se viktima vuante edhe nga epilepsia. Familjarët e kanë tërhequr trupin nga morgu, pasi iu bënë ekzaminimet mjeko-ligjore.

LEXONI GJITHASHTU:

• Euronews Albania pranë banesës së 32-vjeçarit, miqtë nuk lejojnë kamerën të afrohet
• FOTO/ Kush është i riu që ndërroi jetë pas shoqërimit në komisariat
• Ndërron jetë 32-vjeçari pas shoqërimit në komisariatin e Tiranës