Nuk ndalen turistët në Gjirokastër, të huaj nga bota vizitojnë qytetin e gurtë

Mot i paqëndrueshëm i stinës së vjeshtës nuk po i pengon vizitorët vendas dhe të huaj të jenë të pranishëm në qytetin e Gjirokastrës.

Për ata që nuk duan shumë njerëz në shëtitjet e tyre, duket se kjo periudhë e vitit është ideale, për të parë nga afër vlerat historike dhe ndërtimore, pjesë e trashëgimisë kulturore botërore nën mbrojtjen e UNESCO-s. Të preferuara për ta ngelen vizitat në Pazarin tradicional, Kalanë e gurtë si dhe komplekset muzealë dhe shtëpitë karakteristike.

” Unë jam nga Gjermania, për mua është një ditë e mirë të vizitoj qytetin sepse nuk është shumë ngrohtë, kjo është preferenca ime ndërkohë që në këtë periudhë nuk ka dhe shumë lëvizje nga turistët”

“Vij në Gjirokastër për herë të parë, vizitova kalanë e Gjirokastrës, më la përshtypje shumë të mira, e kujtojmë historinë tonë, të kaluarën, e popullit tim”

“Koha ishte e zymtë por qyteti i bukur, shumë, mirë kaluam”

“Unë jam nga Berlini, Gjermani, jam për herë të parë në Shqipëri,  po kaloj disa ditë pushimesh dhe kam ndërmarë një tur po kënaqem dhe nuk është problem për mua nëse sot bie shi sepse sërish lëviza në qytet, është periudhë e mirë për të vizituar Gjirokastrën, pashë Muzeun Etnografik, shëtita si dhe shijova gatimet karakteristike”

Është shumë qytet i bukur, i veçantë, ne zgjodhëm për ta vizituar në këtë periudhë të vitit sepse është qetësi dhe moti nuk është i nxehtë, mendoj të rikthehemi sërish në verë”

“Unë e dashuroj këtë qytet këtu, veçanërisht kur është mot i vrenjtur dhe shikon ndërtesat e vjetra, kur të kthehem në SHBA do t’ja rekomandoj bashkëmoshatarëve ta vizitojnë ” –shprehen turistët.

Tashmë turizmi është kthyer në sektorin prioritar për ekonominë lokale në Gjirokastër ndërsa shumë ndërtesa karakteristike janë rijetëzuar duke ofruar shërbime për vizitorët vendas dhe të huaj. Përgjatë këtij vitit zona e Gjirokastrës është vizituar nga rreth 500 mijë të huaj.

LEXONI GJITHASHTU: 

• OKB voton si të jashtëligjshme vendbanimet izraelite në Jerusalem dhe Golan
• Goditi vëllain me sende të forta, nis hetimi për 57-vjeçarin në Elbasan