OBSH: 2% e popullsisë ka përjetuar një gabim mjekësor gjatë marrjes së shërbimeve

1 në 10 pacientë në Europë përfshirë dhe Shqipërinë, janë dëmtuar gjatë marrjes së shërbimit në spitale, ndërsa 4 në 10 në sistemin parësor dhe ambulator në një kohë që 50% e këtyre dëmtimeve janë të shmangshme.

Këto janë disa nga të dhënat e raportit të parë të realizuar nga OBSH për Evropën, si pjesë e një vlerësimi gjithëpërfshirës të cilësisë së kujdesit shëndetësor dhe sigurisë së pacientëve në 53 Shtete.

Raporti i ri, ka faktuar lidhjen e fortë midis cilësisë së kujdesit, jetëgjatësisë dhe shkallës së vdekshmërisë nga sëmundjet e patransmetueshme.

Të dhënat tregojnë se 2% e popullsisë ka përjetuar një gabim mjekësor gjatë marrjes së shërbimeve shëndetësore, ndërsa 1 në 3 vende, ka një plan kombëtar për cilësinë e kujdesit dhe sigurinë e pacientëve, një tregues kyç për cilësinë e kujdesit shëndetësor. Raporti thekson se çdo plan kombëtar shtesë rrit jetëgjatësinë e shëndetshme me 0.57 vite dhe ul me 1.34% probabilitetin e vdekshmërisë nga sëmundjet e patransmetueshme.

Vetëm 13% e vendeve në Rajon kanë një mekanizëm për përfaqësimin e pacientëve/publikut në qeverisjen kombëtare të shëndetësisë.

Raporti përmban gjithashtu profile të detajuara për secilin vend, duke inkurajuar qeveritë të veprojnë për të përmirësuar standardet dhe besimin publik në sistemet shëndetësore.

LEXONI GJITHASHTU:

• Coronavirusi, drejtori i OBSH për Shqipërinë: S’ka nevojë për panik, situata po menaxhohet siç duhet
• OBSH: Identifikohen 2 rastet e para, të infektuara me mpox në Angli