Opozita shqiptare në RMV pranon propozimin francez

Për liderin e partisë opozitare shqiptare në Maqedoninë e Veriut, Zijadin Sela, propozimi francez është i pranueshëm.

Pas takimit me kryeministrin Dimitar Kovaçevski, Sela tha se gjithçka që e çon shtetin drejt Bashkimit Evropian duhet të përkrahet dhe se Maqedonia e Veriut nuk mund të ketë alternativë tjetër.

Lideri i opozitës do të angazhohet edhe për kualifikimin e gjuhës shqipe si e tillë në Kushtetutë, e jo siç është tani si gjuha që e flasin më shumë se 20 për qind e popullatës.

Këtë të hënë në RMV kanë vijuar konsultimet për propozimin francez për fillimin e negociatave të Maqedonisë së Veriut me Bashkimin Evropian.

Propozimi francez u shqyrtua dje edhe nga Këshilli i Sigurisë, të cilin e thirri presidenti Stevo Pendarovski. Kreu i shtetit pas seancës deklaroi se propozimi francez është i pranueshëm.

Propozimi mbërriti në Shkup të enjten e më pas kryeministri Kovaçevski paralajmëroi proces të gjerë konsultativ me koalicionin qeveritar, presidentin Kuvendin, opozitën, si dhe me shoqërinë civile.

LEXONI GJITHASHTU:

• Propozimi francez, vijojnë konsultimet mes palëve në Maqedoninë e Veriut
• Opozita proteston në Shkup, kundërshtohet propozimi francez