Ornaldo Rakipi fajëson Bashën për shpalljen non grata të të atit

Deputeti socialist Ornaldo Rakipi tha se babai i tij Aqif Rakipit do të apelojë vendimin e Departmentit të Thesarit që e shpalli atë person non grata.

Në fjalën e mbajtur nga foltorja e Kuvendit, Rakipi fajësoi ish-kreun e PD, Lulzim Basha se ka përgojuar dhe hedhur baltë pa të drejtë mbi babanë e tij, duke ndikuar në vendimin e publikuar disa ditë më parë.

“Aqif Rakipi është përmendur dhe përgojuar shpesh kohët e fundit, sidomos nga Lulzim Basha dhe ndonjë njeri i afërt me të. Është demonizuar pa të drejtë dhe është hedhur shumë baltë mbi të. Kam një fjalë për Lulzim Bashën. Mos mallko suksesin e tjetrit, por mëso se në thelb politika është marrëdhënia me njerëzit. Dhe pikërisht kjo është arsyeja e dështimit tënd serial, është kjo arsyeja pse ti, edhe pse të janë dhënë shanset më të mëdha që i janë dhënë dikujt në këto 30 vite, nuk arrite të fitosh zemrat dhe besimin e njerëzve. Sepse në thelb je fals dhe sheh vetëm interesin tënd egoist e material”, u shpreh deputeti socialist.

Aqif Rakipi, ish-deputet i PDIU dhe biznesmen është në mesin e 7 personave nga Ballkani Perëndimor të shpallur si të padëshiruar nga SHBA të cilësuar si kërcënim serioz për stabilitetin dhe demokracinë në rajon.

LEXONI GJITHASHTU:

• Sanksionet për Rakipin, Çipa: Ky vendim nënkupton korrupsionin elektoral
• Basha: Aqif Rakipi përgjegjës për masakrën zgjedhore