Osimhen parakalon Weah, afrikani me më shumë gola në Serie A

Viktor Osimhen kryeson listën e golashënuesve të këtij sezoni në Serinë A italiane, ku ka shënuar 23 herë dhe asistuar në 4 raste për shokët e skuadrës.

Në përballjen me Fiorentinën, napolitanët tashmë të shpallur kampionë fituan minimalisht. Osimhen shpërdoroi një 11 metërsh në minutën e 48’, ndërsa korrigjoi gabimin e tij minutat në vijim, aty ku një tjetër penallti u shndërrua në gol prej tij.

Që prej kalimit tek Napoli, sulmuesi nga Nigeria regjistron 47 gola të shënuar dhe bëhet shënuesi më i mirë afrikan në kampionatin Italian. Osimhen ka lënë pas fituesin e Topit të Artë George Weah, liberianin i cili shënoi 46 gola me fanellën e Milanit në periudhën 95-2000. Një qëndrim afatgjatë në Itali i nigerianit mund të thellojë edhe më tej diferencën e golave, ndërsa ka disa oferta në drejtim të tij nga klube të mëdha evropiane.

Në kampionatin Italian mbeten edhe 4 ndeshje deri në përfundim, ku aktualisht është konfirmuar vetëm skuadra kampione, Napoli e cila ka siguruar dhe pjesëmarrjen në Evropë, disa skuadra luftojnë për një biletë në Champions.