Pandemia Covid-19 në RMV, mjeku: Virusi po përhapet shpejt, ka panik në popullatë

Përpos shifrave të larta të personave të infektuar me Covid-19 në Maqedoninë e Veriut, Komisioni për Sëmundje Ngjitëse nuk propozoi masa të reja në mbledhjen e zhvilluar këtë të premte.

Në pesë ditët e fundit janë shënuar 4124 persona të infektuar dhe 101 viktima si pasojë e Covid-19, shifra të cilat tregojnë rritje të ndjeshme të përhapjes së virusit.

Nga ana tjetër kjo ka shkaktuar edhe kolaps në spitalet Covid, pasi janë ezauruar mbi 80% e shtretërve.

Mjeku Aliriza Osmani tha për Euronews Albania se qytetarët janë sensibilizuar dhe i respektojnë masat.

Ai thekson se rritja e rasteve të infektimeve ka ardhur për shkak se virusi po përhapet me shpejtësi.

“Popullata kësaj here e ka kuptuar seriozisht, por me sa duket virusi është shumë më virulent dhe përhapet shumë më shpejt. Në spitale janë rritur numri i të shtruarve dhe atyre që kërkojnë  shërbim. Ka panik në popullatë”, theksoi ai.