Paralajmërimi i Meçollarit: Shqipëria mund të humbë 40 km2 det në Gjykatën e Hagës

Ish-zëvendës komandanti i Forcës Detare, Artur Meçollari paralajmëroi se Shqipëria mund të humbasë një sipërfaqe detare prej 40 kilometra katror, nëse çështja me Greqinë kalon në Gjykatën e Hagës.

Në një intervistë për Euronews Albania, Meçollari nënvizoi se kjo mund të ndodhë, nëse pala shqiptare hyn në marrëveshje, duke i cilësuar si mosdakordësi, çështjet e për të cilat është arritur dakordësia në vitin 2018.

“Gjykata e Hagës ka më shumë çështje  detare të trajtuara se Hamburgu. Nga pikëpamja e specializimit, të dyja kanë specializim të mjaftueshëm, për ta zhvilluar këtë. Çështja është cila do të jenë kushtet mbi të cilat ne do të shkojmë në Hagë, pasi palët duhet të bien dakord me një dokument, i cili do t’i shtrojë pyetjet gjykatës dhe pyetjet do të jenë çështjet e mosdakordësisë që kanë palët.

Nëse ne do të fusim në mosdakordësi, edhe dakordësitë që kemi rënë dakord në vitin 2018, atëherë Shqipëria do të gjendej në pozitë të disfavorshme në Hagë. Ne, me vullnetin tonë, nga përllogaritjet e mia, rezulton që hyjmë me një marrëveshje të tillë, duke i quajtur të gjitha çështjet mosdakordësi, me 40 kilometra katror minus, me një vendim që mund të marrë Gjykata e Hagës”, theksoi ai.

LEXONI GJITHASHTU

• Pse Rama u tërhoq nga dakordësia për detin? Flet ish.zv komandanti i Forcës Detare

• Meçollari për kërkimet në Jon: Greqia, presion Shqipërisë për të shkuar në Hagë
• Greqia kërkon naftë në detin Jon, Meçollari: Është zonë e kontestuar