Paralajmërimi i ministrit grek: Bllokojmë financimet nga BE nëse nuk betohet Beleri

Greqia do të bllokojë çdo financim europian për Shqipërinë nëse Fredi Beleri nuk lejohet të betohet si kryebashkiak i Himarës. Ky është paralajmërimi i ministrit grek të Punës, Andonis Georgiadis gjatë një interviste dhënë për teleivizonin grek ERT.

Georgiadis deklaroi se “shteti fqinj ta harrojë kursin europian nëse pengon betimin e Belerit”.

“Nëse zgjedhjet përsëriten ose betohet një tjetër kryetar bashkie, për Greqinë do të jetë faktor i keq në marrëdhëniet me Shqipërinë për një periudhë të pacaktuar. Shqipëria do ta paguajë shumë shtrenjtë nëse vazhdon të shkelë të drejtat e grekëve. Mesazhi për Shqipërinë sot është i qartë. Nëse vazhdojnë të pengojnë betimin e kryetarit të ri të Bashkisë së Himarës Fredi Beleri, do të duhet ta harrojnë kursin e tyre europian dhe paratë nga Europa”, tha Georgiadis.

Ministri grek bëri thirrje që Shqipëria të rishikojë qëndrimin e saj dhe vlerësoi se mungesa e ftesës për Kryeministrin Rama në darkën informale në Athinë për Ballkanin Perëndimor, është një mesazh i qartë.

“Vendimi i Kyriakos Mitsotakis për të ftuar gjithë të tjerët përveç Ramës mendoj se tregon që çështja e Fredi Belerit nuk po kalon pa pengesa në qeverinë greke. Ata që menduan se Kyriakos Mitsotakis do të ishte i butë në këtë çështje, e kishin gabim”, shtoi ai.

Të hënën në Athinë do të mbahet darka informale për Ballkanin Perëndimor e thirrur nga Mitsotakis. Kryeministrit Rama nuk i është dërguar ftesë nga homologu i tij grek, por në vend të tij është ftuar Presidenti Begaj. Ky i fundit nuk do të shkojë për shkak të agjendës së planifikuar më herët.

LEXONI GJITHASHTU:

• Janullatos viziton Belerin në burg/ Bido: Pse shkoi te ai, por jo te Dako
• GJKKO i refuzoi kërkesën për liri, Beleri do të vijojë të qëndroje në qeli