Pas paralajmërimit për bojkot, Vuçiç vendos të marrë pjesë në samitin e BE-së

Presidenti i Serbisë, Aleksandër Vuçiç do të marrë pjesë në Samitin BE-Ballkani Perëndimor, që do të zhvillohet në Bruksel më 23 qershor.

Lajmin e ka konfirmuar presidencia serbe përmes një deklarate këtë të mërkurë, shkruan Euronews Serbia.

Vendimi u mor pas bisedimeve me kryeministrin e Shqipërisë, Edi Rama dhe kryeministrin e Maqedonisë së Veriut, Dimitar Kovaçevski.

“Pas konsultimeve të hollësishme dhe gjithëpërfshirëse me bashkëpunëtorët dhe anëtarët e qeverive, liderët e tre vendeve vendosën të shkojnë së bashku në samit dhe ranë dakord për parimet që do të jenë shtylla kryesore e bisedimeve me zyrtarë të shumtë të BE-së” tha presidenca serbe në deklaratë.

Më herët gjatë ditës së sotme, kryeministri Edi Rama ka konfirmuar se do të marrë pjesë në samitin e BE-së.

Nëpërmjet një postimi në Twitter, kreu i qeverisë shqiptare shprehet se do të kërkojë që të dëgjohemi për idenë e një Komuniteti të Ri Politik Evropian.

LEXONI GJITHASHTU

• Paralajmërimi për bojkotin e Samitit, Berisha: Rama bën çfarë i thotë Vuçiç
• Bushati: Vuçiç po tenton të na ndajë nga BE, Shqipëria ombrellë për Serbinë
• Vuçiç paralajmëron bojkot të Samitit BE-Ballkani Perëndimor