Pas skandalit të Rubiales, shkarkohet trajneri i ekipit kombëtar të grave të Spanjës

Federata e Futbollit e Spanjës (FFS) e ka shkarkuar të martën Joge Vildan, trajnerin e ekipit kombëtar të grave që e fitoi Kupën e Botës, disa ditë pasi ai e duartrokiti një fjalim kontrovers të shefit të futbollit spanjoll Luis Rubiales rreth puthjes me forcë të futbollistes Jenni Hermoso.

Një bord i ri i formuar pas pezullimit të Rubiales nga FIFA mori vendim për t’ia ndërprerë kontratën trajnerit Vilda, i cili vlerësohet si aleat i ngushtë i Rubiales, sipas agjencisë së lajmeve Reuters.

FIFA, shtëpia e futbollit botëror, e pezulloi Rubialesin më 26 gusht, pasi ai e puthi me forcë në buzë Hermoson, gjatë ceremonisë së trofeut kur kombëtarja e grave e Spanjës e fitoi Kupën e Botës më 20 gusht.

Të premten, Vilda e duartrokiti shefin e futbollit Rubiales pas një fjalimi gjatë të cilit ai nuk pranoi të japë dorëheqje dhe e përshkroi puthjen si një veprim “të lirë, të ndërsjellë dhe konsensual”.

Duke iu drejtuar Vildas, Rubiales e quajti atë si trajnerin më të mirë në futbollin e grave dhe i ofroi kontratë të re katërvjeçare me pagë vjetore prej 500.000 eurove.

Por, një ditë më vonë, Vilda ndryshoi qëndrim dhe e kritikoi Rubialesin përmes një komunikate për media, megjithëse nuk bëri thirrje për dorëheqjen e tij.

Hermoso, ndërkohë, tha disa ditë pas incidentit se u ndje sikur u sulmua nga shefi i futbollit spanjoll.

LEXONI GJITHASHTU:

• Ulet numri i përfituesve të bonusit të bebes, 43% e tyre lindën jashtë Shqipërisë
• Rezoluta PPE për lejimin e betimit të Belerit, vjen reagimi i Edi Ramës