Pasojat e zjarreve në Gramsh, 8 grupe pune në terren për dokumentimin e dëmeve

Me urdhër të Prefektit të Qarkut Elbasan, të gjitha bashkitë e qarkut janë angazhuar në evidentimin dhe dokumentimin e dëmeve të shkaktuara nga zjarri në Gramsh. Procesi i evidentimit duhet të përfundojë brenda një jave dhe më pas dosja e plotë do t’i dorëzohet institucioneve përgjegjëse.

“Falë mbështetjes së Prefektit të Qarkut, Ilir Bejtja, si dhe kolegëve të bashkive Elbasan, Librazhd, Cërrik, Përrenjas, Peqin dhe Belsh, të cilët po kontribuojnë me burime njerëzore, inxhinierë, topografë, veterinerë dhe agronomë, të hënën nis puna në terren me 8 grupe njëkohësisht. Do të bëhet konstatimi dhe vlerësimi i dëmeve në banesa, pajisje shtëpiake, bagëti, të mbjella e pasuri të tjera të prekura nga flakët”, njofton Bashkia Gramsh.

Autoritetet theksojnë se dosja e plotë e dëmeve do të jetë gati brenda një jave, për t’u dorëzuar institucioneve shtetërore dhe donatorëve që kanë shprehur gatishmërinë për të ndihmuar.

Fshatrat e Gramshit ishin ndër zonat më të goditura nga zjarret e ditëve të fundit, të cilat shkaktuan një viktimë dhe dëme të shumta materiale.

LEXONI GJITHASHTU:

• Rrezik për përhapje epidemie, nis groposja e kafshëve të djegura në Gramsh
• PAMJE/ Zjarri në Gramsh, banorët me kova me ujë në luftë me flakët