“Pedagogët s’mund të jenë në tryeza politike”-Elsa Skënderi: Ndikon te universiteti

Më 21 qershor në universitete do të zhvillohen zgjedhjet ku do të vendosen emrat e autoriteteve drejtuese në universitetet publike. Për të folur rreth kësaj ishte e ftuar në Euronews Albania pedagogia e fakultetit të Gjuhë-Letërsisë, Elsa Skënderi Rakipllari.

Pedagogia tha se studentët do duhet të kishin një peshë më të madhe në këto zgjedhje, ndërsa theksoi se është shumë e rëndësishme që politika të rrijë jashtë universitetit, pasi këto janë institucione autonome.

“Ka pasur momente kur universiteti nuk ka shkuar mirë me politikën dhe kjo ka qenë një kokëdhembje e madhe për universitetin. Është shndërruar në momente të caktuara në thuajse një moment ekzistencial për ne që ishim aty brenda dhe punonim.

Pati një krizë institucionale sa mbërriti puna që nuk kishim as letra për të printuar, për shkak të një problemi që erdhi si pasojë e një përplasje të tillë. Çështja është si do e mbajmë jashtë politikën dhe pse jemi kaq të vonuar në këtë drejtim? Universiteti është autonom.

Njerëzit duhet të kuptojnë se ku  kanë angazhimet e tyre dhe duhet ti qëndrojnë angazhimeve të tyre. Gjithkush është i lirë të bëjë zgjedhjet e veta, por nuk është e drejtë që ti shikon pedagogët në universitet dhe më pas i shikon në tryezën e një partie politike. Këtu ka një problem se interesat e partisë në një formë apo në një tjetër, përfundojnë duke u reflektuar në proceset e brendshme të universitetit”,-tha pedagogia.

LEXONI GJITHASHTU:

• Mazniku dhe Rektori i Universitetit të Tiranës firmosin marrëveshje bashkëpunimi
• Mbyllet për 2 ditë Universiteti i Amsterdamit pas protestave pro-palestineze