“Përçarje mes grupimeve të emigrantëve shqiptarë në Greqi”- thotë Cani

Kryetari i shoqatës së emigrantëve në Greqi, Arben Cani, është shprehur se nuk e ka pranuar pasaportën greke pasi do që të mbështesë të gjithë emigrantët shqiptarë në kërkesat e tyre, për të cilat protestuan edhe ditën e djeshme.

I ftuar në emisionin “Good Morning Albanians” në Euronews Albania, ai theksoi se pasaportën do ta marrë së bashku me emigrantët e tjerë shqiptarë.

Ndër të tjera ai u pyet nëse ka komunikuar me Ermal Sulaj, i cili është Kryetar i Komunitetit Shqiptar në Greqi. Për këtë të fundit Cani tha se nuk ka kryer detyrën si duhet, e sipas tij ka ndikuar në ‘përçarjen’ e organizatave të komuniteteve shqiptare në Greqi.

“Më kanë ofruar pasaportën greke në mënyrë që të tërhiqem nga kërkesat për emigrantët shqiptarë, por nuk e kam pranuar. Këtë ofertë ma kanë bërë shumë institucione. Pasaportën nuk do e pranoj; do pres derisa ta marrin dhe emigrantët e tjerë. Shumë kanë keqpërdorur deklaratat. I kam bërë ftesën Ermal Sulës për t’iu bashkuar nismës; e pranoi ofertën time, por pas dy tre ditësh u largua. Është për të ardhur keq, sepse disa njerëz pasi marrin karrigen, nuk e respektojnë. Nuk bëri asgjë për të drejtat e emigrantëve shqiptarë”- theksoi ai.

LEXONI GJITHASHTU: 

• Cani: Duhet të kesh 40 vite i ligjëruar në Greqi që të përfitosh pension
• Pse po protestojnë emigrantët shqiptarë?