Perëndimi kërkon largimin e Rusisë nga Interpoli

Vendet perëndimore si Shtetet e Bashkuara dhe Britania e Madhe, i kanë bërë thirrje Interpolit të pezullojë Rusinë nga organizata ndërkombëtare e zbatimit të ligjit.

Sekretarja e Brendshme britanike Priti Patel tha se Mbretëria e Bashkuar, Shtetet e Bashkuara, Kanadaja, Australia dhe Zelanda e Re kanë kërkuar “pezullimin e menjëhershëm të aksesit të Rusisë në sistemet e Interpolit”, raporton AFP.

Grupi i kërkoi komitetit ekzekutiv të Interpolit të merrte një vendim këtë javë.

“Veprimet e Rusisë janë një kërcënim i drejtpërdrejtë për sigurinë e individëve dhe për bashkëpunimin ndërkombëtar të zbatimit të ligjit”, shtoi Patel.

1/ Alongside counterparts from 🇺🇸 🇨🇦 🇦🇺 and 🇳🇿, I have written today calling on @INTERPOL_HQ and its Executive Committee to take a decision this week, in accordance with its rules, on the immediate suspension of Russia’s access to its systems.

— Priti Patel (@pritipatel) March 6, 2022

Aleatët perëndimorë kanë kërkuar të izolojnë diplomatikisht dhe ekonomikisht Moskën për shkak të pushtimit të Ukrainës.

Të dielën, kryediplomati amerikan Antony Blinken tha se Uashingtoni kishte parë “raporte shumë të besueshme” se Rusia kishte kryer krime lufte gjatë inkursionit, veçanërisht në trajtimin e civilëve.

Në Këshillin e OKB-së për të Drejtat e Njeriut javën e kaluar, anëtarët votuan me shumicë dërrmuese për të ngritur një hetim mbi akuzat për abuzime të kryera nga forcat e Moskës në Ukrainë.

Interpoli, një rrjet prej 194 vendeve anëtare, synon të lehtësojë kontrollin e krimeve ndërkombëtare.

LEXONI GJITHASHTU: 

• Përditësime LIVE 7 mars: Sulm me raketahedhëse në Mykolaiv