Përlotet miku i Silvio Berlusconit, tregon kujtimin më të vyer me të

Senatori italian, Lucio Malan tregoi në një intervistë për Euronews Albania se e dinin që Silvio Berlusconi, ish-kryeministër i Italisë i cili u nda nga jeta sot në moshën 86-vjeçare, ishte i sëmurë, por sidoqoftë lajmi i vdekjes i ka prekur shumë.

Malan u përlot teksa tregoi një histori ku Berlusconi e kishte telefonuar pas një operacioni në zemër që kishte kryer.

“Ajo që tërhiqte vëmendjen te ai është se përveçse ishte një burrë me suksese të mëdha në disa fusha në gjithë botën, kishte një pikë të fortë që ia dilte gjithnjë të kuptonte problemet e të gjithëve rreth tij. Kishte një marrëdhënie njerëzore fantastike me të gjithë ata që e rrethonin dhe nuk flas këtu vetëm për marrëdhëniet me personat që ai drejtonte, por edhe bashkëpunëtorët e tij më të afërt.

Në 2010-tën jam operuar nga zemra dhe Berlusconi merrte gruan time në telefon për ta siguruar që unë do të isha mirë dhe ka telefonuar mjekët vetëm për t’u interesuar për shëndetin tim. Ishte një mik shumë i mirë. Kam punuar me të, kam mësuar shumë dhe është fat i madh që ia dola të njoh dhe të kem pranë vetes një person me karakter kaq të madh dhe figurë kaq të rëndësishme,” – u shpreh Malan.

LEXONI GJITHASHTU:

• Gazetarja shqiptare rrëfen bisedat me Berlusconin: I bindur se do jetonte 120 vjet
• Njiheshin për miqësinë e ngushtë, Vladimir Putin reagon për vdekjen e Berlusconit