Plani me 5 pika i kryeministrit Kurti për situatën në Veri, reagon DASH

Departamenti Amerikan i Shtetit u bëri sërish thirrje Kosovës dhe Serbisë që të ndërmarrin veprime të menjëhershme për të çtensionuar situatën në veri të Kosovës.

“Shtetet e Bashkuara dhe Bashkimi Evropian ua kanë bërë të qartë pritjet tona të dyja palëve. Këto diskutime po vazhdojnë”, tha për Radion Evropa e Lirë një zëdhënës i DASH-it në pyetjen se si Uashingtoni e komenton planin pesëpikësh të kryeministrit të Kosovës, Albin Kurti, për uljen e tensioneve në veri.

Lidhur me pikën e parë të planit të paraqitur nga kryeministri Kurti që lidhet me identifikimin, ndjekjen penale dhe gjykimin e “grupeve kriminale që kanë sulmuar Policinë, trupat e NATO-s dhe gazetarët” në veri të Kosovës, zëdhënësi i DASH-it tha se: “Ata që janë përgjegjës për sulmet e dhunshme duhet të mbahen përgjegjës, pas një procesi të rregullt ligjor dhe me transparencë të plotë”

SHBA-ja dhe BE-ja i kanë paraqitur Kurtit tri kërkesa: qetësimin e situatës në veri, mbajtjen e zgjedhjeve të reja në katër komunat në veri dhe kthimin në dialogun për normalizimin e raporteve Kosovë-Serbi.

Tensionet në veriun e Kosovës nisën më 26 maj, kur Policia e Kosovës ndihmoi kryetarët shqiptarë të komunave Zveçan, Zubin Potok dhe Leposaviç të vendosen në objektet komunale, me gjithë rezistencën e banorëve lokalë.

Tensionet kulmuan më 29 maj, kur serbët lokalë u përleshën me ushtarët e misionit të NATO-s në Kosovë, KFOR. Nga përleshjet mbetën të lënduar dhjetëra persona nga të dyja palët.

LEXONI GJITHASHTU:

• “Alarmuese”, Memli Krasniqi: Kosova ka nevojë më shumë se kurrë për Shqipërinë
• Gazetari: Rama i vendosi Kurtit sanksionet e para, i konsultuar nga ndërkombëtarët