“Po planifikonin aneksimin e Veriut”- Ushtria e Serbisë reagon për akuzat e Kosovës

Shefi i Shtabit të Përgjithshëm të Ushtrisë së Serbisë, Millan Mojsilloviç, ka reaguar për herë të parë në lidhje me sulmin në veri të Kosovës. Ai i mohoi akuzat e autoriteteve të Kosovës se Serbia, përmes sulmit në Banjskë, ka synuar aneksimin e veriut të Kosovës.

“Ushtria serbe është një organizatë serioze, e fortë, që nuk toleron gënjeshtra”, tha Mojsilloviç në një konferencë për gazetarët në Beograd.

“I mohoj të gjitha akuzat e bëra nga Prishtina”, theksoi ai.

Kujtojmë se deklaratata për aneksimin e veriut të Kosovës u bënë fillimisht nga Ministri i Brendshëm i Kosovës, Xhelal Sveçla, të dielën.

Sakaq edhe kryeministri Kurti njoftoi këtë të hënë se dokumentet e gjetura në vendngjarje tregojnë për një plan të mirë-detajuar, ku pas sulmit terrorist do të hapej një korridor sigurie që do të lejonte futjen e trupave nga Serbia me qëllim aneksimin e Veriut.

Kujtojmë se plani i organizuar për destabilizimin e Kosovës, u zbulua më datë 24 shtator, ku pas një përplasjeje të armatosur mes policisë së Kosovës dhe terroristëve humbi jetën efektivi Afrim Bunjaku.

Më pas grupi i armatosur u tërhoq në manastirin e Basnjkës, ku pas një përplasje me policinë e Kosovës ndërruan jetë të paktën 3 prej tyre.

Policia e Kosovës ka vazhduar me operacionet e saja ku ka konfiskuar arsenal armësh në zonën ku ndodhi sulmi, duke përfshirë këtu: granatahedhës, antiplumb, karikator me fishekë, kapela ushtarake, dorëza, pushkë gjuetie, snjaper, radiolidhje.

Serbia i mohon akuzat e Kosovës se është e përfshirë në këtë sulm, të cilin autoritetet kosovare e cilësuan si akt terrorist.

Përgjegjësinë për të e mori Millan Radoiçiç, i cili ka qenë nënkryetar i Listës Serbe – partisë më të madhe të serbëve në Kosovë.

LEXONI GJITHASHTU:

• “Do krijohej kordon për futjen e trupave”- Kurti: Plani i serbëve sipas dokumenteve
• A u tërhoq me të vërtetë Vuçiç? Eksperti zbulon sa trupa janë në kufi
• Vuçiç mohon vendosjen e ushtrisë në kufi me Kosovën: Gënjeshtra kundër vendit tonë