Po shkëlqen me Strugën, Zguro ‘sinjale’ pozitive trajnerit Sylvinho

Struga është një hap larg fazës së grupeve të Conference League, ndërsa pengesa e fundit mban emrin Breidablik. Skuadra e udhëhequr nga Shpëtim Duro ka zhvilluar paraqitje pozitive, ndërsa ka mundur të kalojë 3 raunde të kompeticionit, e për këtë meritë kanë dhe lojtarët.

Eksperienca dhe talenti janë ndërthurur në skuadrën kampione të Maqedonisë së Veriut, madje edhe futbollistët e transferuar këtë verë. Njëri prej tyre është Vangjel Zguro, anësori që ka një karrierë të pasur futbollistike. 30-vjecari ka luajtur për disa skuadra në Superligën Shqiptare e madje deri në Amerikë, ndërsa së fundmi ishte pjesë e Bylis.
Zguro ka qenë një zgjedhje e zgjuar e teknikut Duro, ndërsa e ka treguar këtë me performancat e tij ndaj Buducnostit dhe Hesperange. Pogradecari njihet për temperamentin e tij dhe shpirtin luftarak në fushë, ndërsa do të ishte i gatshëm dhe për të dhënë kontributin në kombëtaren shqiptare. Në një situatë ku kuqezinjë kanë probleme në repartin difensiv për shkak të dëmtimeve, Zguro do të ishte një alternativë pozitive në krahun e majtë.

Performanca e tij në Evropë është një sinjal për trajnerin Sylvinho, i cili ende nuk e ka konfirmuar listën e lojtarëve për ndeshjet kualifikuese. Kombëtarja shqiptare shpesh ka shfaqur probleme sa i përket mbrojtjes, ndërsa një lojtar i tillë, falë eksperiencës dhe formës pozitive që po kalon do të ofronte më tepër siguri.

LEXONI GJITHASHTU:

• Werder-Bayern ngre siparin, statistikat e sezonit të ri futbollistik
• Mitsotakis “kërcënon” futbollin: Klubet mund të përjashtohen nga garat europiane