Werder-Bayern ngre siparin, statistikat e sezonit të ri futbollistik

Bundesliga gjermane nis këtë të enjtë edicionin numër 61 në histori të futbollit, ndërsa ndeshja e parë për tifozët është Werder Bremen-Bayern Munchen.

Kampionët në fuqi do të tentojnë të mbrojnë titullin e fituar në javën e fundit, ndërsa ishin me pikë të barabartë me Borussia Dortmund.

Bavarezët këtë sezon vijnë me shumë ndryshime, pas disa ndërhyrjesh të kryera në merkato dhe me një sulmues bomber sic është britaniku Harry Kane.

Jo më kot cilësohen si rekordmenët e Bundesligës, pasi në 60 edicionet e mëparshme, 32 janë fituar nga Bayern. Sezoni pritet të jetë edhe më i luftuar nga të gjitha skuadrat, konkretisht ekipe si Leipzig apo Dortmund do të synojnë të bëjnë mirë, pse jo titullin kampion.

Kujtojmë se Superkupa e pak ditëve më parë u fitua nga Leipzig, i cili mposhti Bayernin me rezultatin 3-0, duke u dhënë kështu një mesazh bavarezëve se do të jenë një kockë e fortë në ligë.

2 janë skuadrat të cilat siguruan promovimin në elitën e futbollit gjerman, Heidenheim dhe Darmstadt. Në total kampionati do të ketë sërish 18 skuadra, rregull i cili vijon që prej vitit 1992. Java e parë nuk premton përballje ferri, por me interes është ajo mes Leverkusenit e Leipzigut, me të dyja skuadrat të cilat synojnë të renditen në 3 vendet e para.

Der Klassiker luhet në javën e 10-të, ku Dortmundi do të presë në shtëpi Bayernin e Mynihut.

LEXONI GJITHASHTU: 

• Riaktivizohen zjarret në Dropull
• Referendumi për emigrantët/Debate në Poloni, qeveria mbështet nismën, opozita kundër