Presidenti Bajram Begaj i jep titullin “Mjeshtër i Madh” Nikoll Lesit

Presidenti i Republikës së Shqipërisë, Bajram Begaj, i ka akorduar titullin “Mjeshtër i madh”, themeluesit dhe botuesit të gazetës Koha Jonë, Nikoll Lesi.

Kreu i shteti, cilësoi se ky titull i jepet Lesit në shenjë mirënjohje, si botuesi pioner, që themeloi median e parë të shkruar në Shqipëri.

“Të nderuar të pranishëm! Jemi këtu sot për t’i dorëzuar titullin “Mjeshtër i Madh” gazetarit, drejtuesit dhe botuesit të suksesshëm, Nikollë Lesi. Ky titull i firmosur nga unë disa muaj më parë, nuk u tërhoq nga zoti Lesi. Përmes një modestie të pashëmbullt, ai kërkoi që titullin ta tërhiqte në 33-vjetorin e gazetës “Koha Jonë”, pikërisht më 11 maj. Siç m’u shpreh,- ky titull shkon për kontributin, pasionin, profesionalizmin e të gjithë atyre që kanë kontribuar dhe punuar me të. Ata kanë ruajtur e kanë marrë me vete nga ajo kohë idealizmin dhe pasionin, pasi në çdo kohë këto janë vlera që duhet të shoqërojnë profesionalizmin dhe paanësinë në thënien e së vërtetës.Vetëm kështu ata kanë arritur të jenë faktorë, influencues të opinionit publik dhe të meritojnë të qenurit Pushteti i Katërt. Gëzuar 33 vjetorin Koha Jonë! Gëzuar Nikollë Lesi”, tha Presidenti Begaj në ceremoni.

Për Nikoll Lesin, ky titull i cili vjen në ditën e 33 vjetorit të  gazetës “Koha jonë” shkon për të gjithë ata gaztetarë e bashkëpuntorë që u bënë pjesë e misionit për fjalën e lirë.

“Më lejoni zoti president i Republikës, t’iu falënderoj për këtë nderim të veçantë. Ky titull shkon për kontributin, pasionin, profesionalizmin, sakrificat dhe idealizmin e gjithsecilit prej atyre që kanë qenë pjesë e këtij rrugëtimi mediatik”, u shpreh ai ndër të tjera.

Ceremonia e këtij titulli u finalizua me trokitjen e gotave, për t’u pasuar edhe me bisedat miqësore mes të ftuarve, miqve, kolegëve, gazetarë e bashkëpunotorë.