Protesta/Avokati i Popullit: 11 të shoqëruar në polici, 1 prej tyre është dhunuar

Institucioni i Avokatit të Popullit ka monitoruar ditën e djeshme protestën e organizuar nga opozita në Tiranë.

Sipas institucionit në terren përgjatë gjithë kësaj proteste kanë qenë 4 grupe monitoruese, e më tej pas përfundimit të protestës janë monitoruar të gjitha komisariatet e Tiranës. Institucioni i avokatit të popullit, ka reaguar duke thënë se pavarësisht se klima e protestës ka qenë e qetë, 11 persona janë shoqëruar në polici.

Nga këta 1 prej tyre ka pretenduar se është dhunuar nga policia, ndërsa ka pasur edhe shenja të dukshme lëndimi në fytyrë, ënjtje dhe mavijosje në syrin e majtë.

Përsa më sipër Avokati i Popullit bën me dije sa më poshtë vijon:

Protesta është zhvilluar përgjithësisht në një klimë paqësore, përtej disa incidenteve të lokalizuara, gjatë ecurisë së saj.

Nga monitorimi i kryer në komisariate ka rezultuar se deri në orën 22:00 ka pasur 11 të shoqëruar, vetëm në Komisariatin nr.1, të gjithë persona madhorë, ndërsa në komisariatet e tjera nuk ka pasur të shoqëruar.

Mes të shoqëruarve, një nga këta shtetas pretendon se është dhunuar gjatë kësaj proteste nga policë civilë, në momentin e ndalimit.

Shtetasi A.M kishte shenja të dukshme lëndimi në fytyrë, ënjtje dhe mavijosje në syrin e majtë dhe Avokati i Popullit i mori një ankesë e cila do të trajtohet në vijim.

Avokati i Popullit thekson se e drejta e protestës paqësore është një e drejtë thelbësore, e njohur dhe e garantuar nga Kushtetuta.

LEXONI GJITHASHTU:

• Protesta e parë pa Berishën, kush po i udhëheq protestuesit drejt Kryeministrisë
• Mbahet protesta e Rithemelimit, Berisha mesazh online qytetarëve