Protestë kundër Zaev, qindra qytetarë protestojnë para qeverisë, kërkohet dorëheqja e tij

Mbështetës të partisë nacionaliste veriomaqedone VRMO-DPMNE kanë dalë mbrëmjen e së enjtes në protestë për të kundërshtuar qëndrimet e kryeministrit Zoran Zaev mbi Bullgarinë.

Nën moton “ Protestë tani, që të mos jetë shumë vonë”, dhjetëra qytetarë me makina qëndruan para godinës së qeverisë për minuta të tëra.

Sipas kreut të VRMO-DPMNE-së, Hristjan Mickoski, Zaev po bën pazare me gjuhën, historinë dhe identitetin maqedonas.

Korrespondenti i Euronews Albania në Maqedoninë e Veriut, Benjamin Arifi tha se protesta u nxit nga një intervistë e dhënë prej Zaevit ndaj mediave bullgare.

“Zaev në atë intervistë paralajmëroi në njëfarë mënyre zbutjen e qëndrimit ndaj Bullgarisë dhe hapjen për një marrëveshje eventuale dhe kjo u interpretua nga VRMO-DPMNE si tentativë për të shitur identitetin dhe historinë e popullit maqedonas,” – tha gazetari Arifi.

Në intervistë mes rreshtash kuptohet një kritikë e Zaevit ndaj Presidentit Stevo Pendarovski dhe një ndryshim mes pikëpamjeve që ata kanë.

Protestat pritet të vijojnë më tej ndërsa opozita do të formalizojë një mocion mosbesimi ndaj qeverisë javën e ardhshme.