Avokati Leonard Karaj, i ftuar në një lidhje live për Euronews Albania, komentoi zhvillimet e fundit lidhur me arrestimin e Kryebashkiakut të Tiranës, Erion Veliaj.

Ai theksoi se me akuzat që janë ngritur ndaj tij, ishte e pamundur që Veliaj të mos përballej me një masë sigurie si ajo e masës së arrestit.

“Brenda 72 orëve, Veliaj do të dalë para gjykatës për masën e sigurimit. Avokati do të kërkojë një masë më të butë, por nuk besoj se mund të ketë një masë tjetër për Veliajn. Kam qenë shumë kritik ndaj SPAK-ut, por po them që veprat penale për të cilat, sipas SPAK, akuzohet Veliaj, ishte pamundur që të mos kishim një masë ndaj personit”, tha Karaj.

Ai gjithashtu u shpreh se Veliaj është akuzuar për vepra penale të rënda, që e vendosin atë në një gamë dënimesh që variojnë nga 3 deri në 30 vite burg, duke bërë të pamundur që të mos merrej një masë sigurie për të. Karaj nënvizoi gjithashtu se është hera e parë që një person me kaq shumë pushtet është arrestuar në zyrën e tij, duke e cilësuar këtë si një veprim të SPAK që “e ka ngritur stekën aty ku i takon të qëndrojë”.

“Personat e tjerë të akuzuar e kanë akuzën më të lehtë, por nuk dihet si mund ta klasifikojë nesër prokuroria, pasi mund t’i bashkojë si grup i strukturuar kriminal”, përfundoi ai.

LEXONI GJITHASHTU:

• Veliaj dërgohet te Bllok i Sigurisë te “Mine Peza”, arrest në shtëpi për Ajola Xoxën
• Arrestimi i kryebashkiakut Erion Veliaj, Rama anulon takimet në Shkodër