Kryeministri Edi Rama pranoi se çmimi i naftës në Shqipëri është më i larti në rajon, por theksoi se taksat në vend janë më të ulëtat.

Gjatë fjalës së tij në seancën plenare në Kuvend, duke iu përgjgjur deputetes demokrate Jorida Tabaku, Rama u shpreh se Shqipëria është i vetmi vend në rajon ku biznesi i vogël nuk paguan taksë dhe TVSH për xhiro deri në 100 milionë lekë.

“Është një e vërtetë për të cilën ne kemi dhënë argumentat pse. Është e vërtetë që ne kemi një çmim karburanti më të lartë se të tjerët në rajon. Kjo është e vërtetë. Por, ndryshe nga të tjerët në rajon, ne kemi taksat më të ulëta, sepse ndryshe nga rajoni, ne biznesit të vogël nuk i marrim asnjë lekë.

Zero taksë dhe zero TVSH deri në 100 milion xhiro. Ndryshe nga rajoni, ne vërtet e kemi më të lartë se të tjerët taksën mbi biznesin e madh, por ne subvencionojmë 100% energjinë elektrike”, tha Rama.

Bordi i Transparencës vendosi këtë të mërkurë që çmimi i naftës të jetë 258 lekë për litër.

Ndërsa, çmimi i benzinës 243 lekë/litri dhe ai i gazit të jetë 86 lekë/litri.

LEXONI GJITHASHTU

• Kur do ndalojë së funksionuari Bordi i Transparencës? Përgjigjet Ahmetaj
• Rritet çmimi i naftës, 258 lekë/litri