Rama: Do të nisim prodhimin e mjeteve zjarrfikëse për bashkitë

Kryeministri Edi Rama zhvilloi këtë të premte një takimin me kryebashkiakët socialistë ku theksoi se një pikë e rëndësishme është ringritja e emergjencave, për të cilën tha se në fokus janë ekipet zjarrfikëse, të cilat në pikun e sezonit të verës përballen me vështirësi për shkak të zjarreve. Rama paralajmëroi se do të nisë edhe prodhimi i mjeteve zjarrfikëse, të cilat do t’u vihen në dispozicion bashkive.

“Jemi të vetëdijshëm për mangësitë e trashëguara në logjistikën që lidhet me zjarrfikësit. Për këtë arsye kemi miratuar një projekt të paraqitur nga ministri i pushtetit vendor, lidhur me mobilizimin e një financimi të nevojshëm duke shfrytëzuar kapacitetet e kompanisë që është një shoqëri e përbashkët shtetërore dhe private e krijuar rishtazi në sistemin tonë të Ministrisë së Mbrojtjes. Do nisim të vëmë në dispozicion të bashkive automjetet zjarrfikëse që janë të domosdoshme”, tha Rama.

Po ashtu Rama tha se do të ngrihet një task-forcë për mbeturinat dhe do të hartohet një plan që shtrihet nga sensibilizimi te hapat konkretë.

“Po punojmë për të riparë sistemin e mbledhjes së mbeturinave, gjë që e kemi bërë me dije sa i përket aspektit të përpunimit të mbetjeve, por flas për mbeturinat që përgjithësisht janë problem, sidomos në sezonin turistik, në hapësirat e bashkive që s’janë zona urbane. Për këtë, është e domosdoshme të ngrihet një task-forcë mes qeverisë dhe pushtetit vendor, gjë për të cilën është ngarkuar ministri i Mjedisit dhe Pushtetit Vendor për të hartuar një plan afatshkurtër, afatmesëm, afatgjatë, nga sensibilizimi masiv te hapat që duhen ndërmarrë”, tha Rama.