Rama i rendit ndjekësit investimet në veri: Dënglat për veri e jug mos mi trego mua

Kryeministri Edi Rama i është përgjigjur një komentuesi në rubrikën e tij “Sy m’sy” në Facebook, i cili e akuzoi se qeveria e tij ka bërë më shumë investime infrastrukturore në jug të vendit, duke lënë pas dore veriun.

“Të ngeli harta vetëm në jug, turp ta ndani Shqipërinë në dysh”, i shkruante ndjeksi Ramës.

Reagimi i kryeministrit ka qenë i drejtpërdrejtë:

“Këto dëngla për veri e jug mos mi tregoni mua, sepse edhe me gjak jam nga veriu dhe jugi. Kam pasur bekimin të kem një gjyshe shkodrane dhe një gjysh me prejardhje nga Berati, por lindur e rritur në Durrës. Po ashtu, gjyshërit e tjerë janë nga bregu, por kanë origjinën nga Mirdita,” tha Rama.

Kryeministri më pas renditi disa nga investimet më të mëdha të realizuara sipas tij në infrastrukturën e veriut të vendit.

“Ky komenton lidhur me infrastrukturën. Një ndër veprat më të mëdha dhe më të vështira, por gjithashtu një ndër më të konsiderueshmet nga pikëpamja financiare, është rruga e Arbrit. Kjo shkon në jug apo në veri? Nëse e shohim edhe Kosovën, mund ta konsiderojmë si jug, por nëse i referohemi hartës zyrtare të Shqipërisë, është në veri, në zemër, pasi Dibra është në fakt këtu, në qendër. Rruga e Thethit, a është në jug apo në veri? Unë do të thosha se është në Shqipëri. Po rruga që shkon në Vermosh, është në jug apo veri? Rruga e Lurës, sipas teje, është në jug apo veri? Patjetër që rruga e Kombit është në veri, dhe është trajtuar, siç janë trajtuar të gjitha rrugët e tjera. Në një stad më të avancuar, nuk e mohoj këtë, por puna vazhdon ende. Të gjitha këto janë ndërtuar nga kjo qeveri, dhe përfundimi i rrugës së Lurës hap mundësi për një tjetër destinacion fantastik. Ka edhe shumë projekte të tjera për infrastrukturën e veriut. Hekurudha Durrës-Shkodër-Gjakovë-Prishtinë shkon në jug apo veri? Po rruga Thumanë-Milot-Balldren-Muriqan, është në jug apo veri? Ende ka shumë segmente të tjera që janë investuar në veriun e Shqipërisë, i cili ka qenë shpesh më i prapambetur se jugu, sidomos kur qeverisnin ata që thonin se e donin shumë veriun dhe e përfaqësonin atë. Edhe vetë Tropoja ishte një “gropë e zezë”, ndërkohë që sot është një destinacion turistik”, tha Rama.

LEXONI GJITHASHTU:

• “Mora leje për ta publikuar”, Rama sqaron foton me zarfin e votës së diasporës
• Rama: Tirana do të jetë epiqendra e politikës evropiane me 16 maj