Rama: Investitorët e Zvërnecit kanë zhvilluar një nga destinacionet më të vizituara në Katar

Kryeministri Edi Rama ka postuar foto nga një kompleks turistik në një ishull të Katarit, duke e sjellë atë si një shembull suksesi të investimeve të vëllezërve Al Khayyat, të cilët janë gjithashtu të përfshirë në projektin e Zvërnecit në Shqipëri.

Rama thotë se ky kompleks është një nga destinacionet më të vizituara turistike të Lindjes së Mesme, i administruar nga brendi “Anantara” ndërsa thekson se investim është realizuar nga të njëjtët vëllezër që janë bashkëpronarë të konglomeratit “Power International Holding”, të cilët janë edhe blerës të tokës private dhe bashkëinvestitorë në projektin e Zvërnecit.

Kryeministri ngre pyetjen se si mund të mendohet që një kompani e tillë të dëmtojë reputacionin e saj me, siç i cilëson ai, “budallallëqet” që thuhen për projektin në Zvërnec.

“Nuk kemi ç’bëjmë. Por budallallëku që e ka lënë këtë vend 100 vite mbrapa botës, nuk do ta marrë dot peng Shqipërinë europiane dhe turistike”, shkruan Rama.

Kreu i qeverisë jep edhe detaje për kompaninë “Power International Holding”, duke e përshkruar si një konglomerat nga Katari me mbi 400 kompani, të organizuara në gjashtë sektorë kryesorë të ekonomisë, me një portofol të vlerësuar rreth 40 miliardë dollarë. Sipas tij, grupi ka mbi 65 mijë të punësuar dhe operon në 25 vende të botës.