Rama: Krenar, mësuesit shqiptarë me rezultate pozitive në testin ndërkombëtar TALIS

Kryeministri Edi Rama ka marrë pjesë ditën e sotme në prezantimin e raportit të OECD për rezultatet e TALIS, Anketës Ndërkombëtare të Mësimdhënies dhe të Nxënit. Rama u shpreh se vendi ynë ka dalë me rezultate domethënëse pozitive në këtë anketë.  Ai theksoi se anketa ka treguar se 85% e mësuesve e kanë zgjedhur vetë mësimdhënien si vokacion dhe profesion.

“Ka disa të dhëna pozitive shumë inkurajuese edhe përsa i përket objektivave që kemi duke pasur parasysh nevojën për të nxitur më tutje teknologjinë, patjetër që është shumë inkurajuese që mesatarja e mësuesve tanë që kanë lidhje me përdorimin e teknologjisë është më e lartë se sa mesatarja e të gjithë sistemeve të marra së bashku në këtë anketim.

Po ashtu na vjen mirë të shohim që përpjekjet që kemi bërë për partneritetin mes shkollës, prindërve dhe nxënësve duke nxitur modelin e shkollës qendër komunitare por dhe ndërveprimin, reflektohet si një element më pozitiv se mesatarja e sistemeve të anketuara,” u shpreh Rama.

Kryeministri theksoi se mbështetja e mësuesve të rinj, ulja e ngarkesës së punës dhe përfshirja e AI në praktikat e klasës janë objektiva që duhet t’i ndjekin bashkërisht.

“Ka një shqetësim që ne nuk na gjen të papërgatitur, por që reflektohet në anketim se një pjesë e mësuesve të rinj ata nën 30 vjeç raportojnë se mund ta lënë profesionin nëse nuk do ndihen të mbështetur dhe të motivuar mjaftueshëm,’ shtoi ai.