Rama kritikon SPAK: Mos shikoni as majtas, e as djathtas

Në përfundim të Kongresit të PS, Kryeministri Rama doli në një konferencë për mediat ku foli për ‘drejtësinë e munguar’.

Rama shprehu hapur kritika ndaj SPAK duke thënë se “ajo që nuk shkon të gjithë e shohin”. Kryeministri iu referua në mënyrë konkrete mos hetimit të ish-kryeministrit Berisha.

“Shpresojë të kenë gjunjë të forta. Të bëjnë detyrën historike që kanë ndaj Shqipërisë, shqiptarëve dhe reformës. Të godasin nga të gjitha anët, por të godasin lart”, tha Rama.

Ai tha se ‘vjedhjet marramendëse dihet se kush i ka bërë’ duke shtuar se ‘janë të gjitha dosjet, dokumentet, dëshmitarët’ për të hetuar deri në fund.

“Kuçedra e korrupsionit duhet goditur në kokë. Nëse janë të gatshëm të dinë se kush është koka, jam i gatshëm të shkoj që nesër te SPAK”, tha kreu i qeverisë.

Sipas Ramës deri tani SPAK ka hetuar vetëm zyrtarë të PS, duke mosndëshkuar ish-zyrtarë por edhe ish-funksionarë të drejtësisë që nuk justifikojnë pasurinë.

I pyetur nga gazetarja e Euronews Albania, Eksiola Shehu nëse po i bën presion drejtësisë duke u shprehur se po godet vetë një anë, atë të PS, Rama tha se vetëm po e nxit që të hetojnë më tepër nga opozita.

“Unë u them që bjerini sa keni fuqi, mos shihni as majtas, e as djathtas, që të mos shkoni vetëm për peshk. Nëse të gjithë i bëjnë presion siç i bëj unë, burgu do ishte shumë pluralist, nuk do ishte monopartiak”, tha ai.