Kryeministri Edi Rama ka zhvilluar këtë të hënë (24 shkurt) një takim në selinë e Partisë Socialiste me drejtuesit politikë të qarqeve dhe përfaqësuesit në qendër, në kuadër të përgatitjeve për zgjedhjet e 11 majit.

Burime nga mbledhja bëjnë me dije se një nga çështjet kryesore të diskutimit ka qenë vota e diasporës.

Me procesin e regjistrimit që po i afrohet fundit, socialistët janë angazhuar me takime intensive jashtë vendit, kryesisht në Greqi dhe Itali, për të inkurajuar pjesëmarrjen e emigrantëve në zgjedhje.

Aktualisht, mbi 170 mijë shqiptarë me vendbanim jashtë vendit kanë të drejtën e votës, dhe Partia Socialiste synon ta shfrytëzojë këtë potencial për të përmirësuar rezultatin krahasuar me zgjedhjet parlamentare të vitit 2021.

Deputetë dhe drejtues politikë janë shpërndarë në komunitetet shqiptare jashtë vendit për të informuar dhe mobilizuar votuesit e mundshëm.

Në përfundim të takimit, Rama u pa i shoqëruar nga kryebashkiaku i Shkodrës, Benet Beci, me të cilin ka zhvilluar diskutime shtesë mbi situatën elektorale.

Gjithashtu, në mbledhje janë analizuar masat dhe përgatitjet e strukturave për zgjedhjet e ardhshme.

LEXONI GJITHASHTU:

• Rama bisedë telefonike me Zelenskyn, zbardhen çështjet e diskutuara
• Rama i përgjigjet Berishës: Pse i mblodha punonjësit e bashkisë