Kryeministri Edi Rama është shprehur se ka vdekur çdo shans që ‘hijet e së shkuarës’ (etiketon opozitën) të rikthehen në pushtet.
Komentet Rama i bëri gjatë takimit me shqiptarët në Milano, ku tha se nëse ata rikthehen në pushtet do të çojnë në drejtim të paditur fatin europian të Shqipërisë.
Ai tha gjithashtu se sot është një Shqipëri tjetër, e ndryshme në shumë drejtime nga ajo e disa viteve më parë.
“Shqipëria ku vriteshin çdo vit mbi 100 vetë dhe ku policët i shtynin makinat që mbeteshin pa benzinë rrugëve, Shqipëria ku turizmi mbahej vetëm nga patriotizmi, Shqipëria ku ju duhet të merrnit rrugën mbrapsht për të marrë një dokument, ka vdekur përgjithmonë.
Siç ka vdekur njëherë e përgjithmonë çdo shans që hijet e së shkuarës të rikthehen mbi kalë, për ta shaluar në drejtim të paditur fatin europian të Shqipërisë.
Mos e harroni në asnjë sekond përballë çdo gjëje që nuk shkon, ka ndodhur që Shqipëria sot ka fituar besimin e botës dhe meriton edhe besimin e çdo shqiptari. Besimin e çdo shqiptari si ju, që e di shumë mirë se çdo gjë nuk arrihet pa mund e sakrifica”, tha Rama.
LEXONI GJITHASHTU:
- Rama nga Milano: Shqiptarët e Italisë janë përbashkuesit e dy brigjeve të Adriatikut
- Pas takimit në Athinë, kryeministri Rama mbledh sot bashkëatdhetarët në Milano